إذا توّك بادي في النادي اكيد لاحظت كثير من الناس حولك يستخدمون منتجات الطاقة (Pre-workout) البودرة او الموجود في البقالات حاليا بالعلب. بس قليل اللي فاهم ليه قاعد يستخدمها. لذلك اليوم بعلمك بعون الله:
كيف تستخدمها؟ وش انواعها؟ و هل فعلا بتفرق معك؟
هذا اللي بشرحه لك اسطورتي في هذا المقال، بحرص اخليه مرجعك الوحيد اللي تحتاجه لمنتجات البري. ونهاية المقال بعلمك كيف تختار المنتج الانسب لك.
البري ووركاوت نقدر نقسمه لنوعين أساسيين:
١- النوع الأول: بري ووركاوت مع كافيين. وجود الكافيين كعنصر أساسي بيساعدك على زيادة التركيز الذهني وتقليل التعب، وأيضاً فيه مواد ثانية بنتكلم عنها.
٢- النوع الثاني: بري ووركاوت بدون كافيين. لكن فيه مواد تزيد من ضخ الدم (البمب)، وهذا أفضل للأشخاص اللي يبغون زيادة التركيز في النادي وزيادة ضخ الدم بدون ما يكون فيه كافيين، عشان ما يأثر على نومهم، خصوصاً الأشخاص اللي يمشون النادي في الليل ما بعد الساعة ٦.
إيش اللي يكون داخل منتجات الطاقة؟
أولاً: المواد اللي تزيد التركيز الذهني وتقلّل الإجهاد، أهمها:
١- الكافيين وهو الأهم، ووجود الكافيين في منتجات الطاقة بتركيز عالٍ بين ١٠٠-٣٠٠ ملجم (الحد الأعلى الموصى به للكافيين ٤٠٠ ملجم في اليوم فقط).
وهنا لازم تكون حذر إذا تستعمل النوع هذا من منتجات الطاقة، خصوصاً إذا تاخذ قهوة خلال اليوم، لازم تتأكد إنك ما تتخطى الـ ٤٠٠ ملجم في اليوم، لأن ذا راح يؤثر على نومك بالسلب وراح يزيد عندك معدل ضربات القلب.
مشكلة هذا النوع من منتجات الطاقة إن جسمك يتعوّد مع الوقت على الكافيين، وعشان تستمر في انك تحصل نفس الفايدة منه تحتاج تزيد الجرعة عشان تاخذ كافيين أعلى. وهذا مو أفضل شي، عشان كذا لازم تقطعه كل فترة وفترة وترجع تستخدمه. او تحد استخدامه على الايام اللي تكون مرهق فيها فقط.
٢- التيروسين لكن تأثيره على الأداء الرياضي أقل مقارنةً بالكافيين.
ثانياً: المواد اللي تزيد ضخ الدم او احساس البمب، أهمها:
١- السيترولين ماليت: وهو الأهم والعنصر الأساسي لزيادة ضخ الدم، واللي يعطيك إحساس بالبمب، خصوصاً إذا نسبة دهونك قليلة تحس إن العروق تبرز بشكل كبير. الجرعة الفعّالة منه تكون بين ٦-٨ جرام.
٢- الأرجنين ايضا كمحفّز لزيادة ضخ الدم (البمب) لكن فاعليته اقل من السيترولين
٣- البيتا ألانين: وذا اللي يسبب عندك إحساس بالحكة.
٤- وممكن يكون فيه الكرياتين
الخلاصة و التوصيات:
أهم قاعدة: لا تعتمد على منتج الطاقة كشي أساسي لك في التمرين، لأن بيجيك إحساس إنك ما راح تقدر تتمرن بدونه. والأهم إنك تعتمد على تغذيتك والنوم لانه هي الاساس ضروري تفهم هالنقطة. واذا بتستخدمه خذه بالايام اللي فعلا تحتاجه فيها مو كل يوم.
واذا بتاخذ منتج بري ورك اوت تاكد يكون فيه هذي الجرعات الفعاله للمواد اللي تكلمنا عنها:
الكافيين: 100–200 ملجم ( اذا بتاخذه مع كافيين )
السيترولين: 3–6 جرام، أو 6–8 جرام سيترولين ماليت.
البيتا ألانين: 3.2–6.4 جرام يوميًا.
الكرياتين: 3–5 جرام يوميًا ( الافضل تاخذه كمكمل على جنب )
ملاحظة: الكرياتين والبيتا ألانين تعتمد فائدتهم على الاستخدام اليومي المستمر، مو على أخذ الجرعة قبل التمرين مباشرة.
إذا تتمرن المساء، الأفضل تاخذ منتج طاقة خالي من الكافيين عشان تنام كويس. لانه الطاقة الحقيقيه تجي من النوم و انك تاكل كويس وليس انك تعتمد على منتج طاقة
إذا تتمرن الصباح وودّك منتج طاقة فيه كافيين، ما فيه مشكلة، لكن الأهم إنك ما تزيد من القهوة أو المشروبات اللي فيها كافيين عشان لا تتجاوز الـ ٤٠٠ ملجم في اليوم وتتأثر جودة نومك.
جاهز للتغيير؟ ابدى معي بالتدريب الاونلاين
